Գերմանիայում գործող «Վտանգված ժողովուրդներ» իրավապաշտպան կազմակերպությունը պահանջում է գերմանական քաղաքներում Հայոց Ցեղասպանության և այլ քրիստոնյա փոքրամանսությունների զոհերի հիշատակին նվիրված հուշարձաններ կանգնեցնել:
Իրավապաշտպան կազմակերպությունը պահանջ է ներկայացրել Գերմանիայի քաղաքների ավագաժողովին: Պահանջ-նամակը փոխանցվել է Կոնգրեսի նախագահ Եվա Լոհսեին:
«Վտանգված ժողովուրդներ» կազմակերպության ներկայացուցիչ Քեմալ Սիդոն նշել է, որ Գերմանիան տեղեակ է եղել Օսմանյան կայսրության կողմից իրագործվող կոտորածների մասին: «Այդ իսկ պատճառով շատ կարևոր է ջանքեր գործադրել, որպեսզի այստեղ ապրող հայերին և մյուս տուժած ժողովուրդների ներկայացուցիչներին թույլ չտանք, որ մոռանան կատարվածը, և մի վայր հատկացնենք, որտեղ հարգանքի տուրք կմատուցեն զոհերին», - ասել է Սիդոնը:
Կազմակերպության հայտարարությունում նշվում է, որ Օսմանյան կայսրությունը բացի հայերի ցեղասպանությունից իրականացրել է նաև այլ քրիստոնյա փոքրամասնությունների կոտորածներ, որոնց զոհ են դարձել մոտ 1.5 միլիոն մարդ:
Աղբյուրը՝ Եռագոյն արեւմտահայերէն լրատուական կայք: