«ՊԱՇՏՊԱՆ ՀԱՅՐԵՆՅԱՑ», հայ ազգային-ազատագրական գաղտնի կազմակերպություն: Հիմնվել է Կարինում (Էրզրում), 1877-78-ի ռուս- թուրքական պատերազմից և հայերի համար անարդյունք ավարտված Սան Ստեֆանոյի պայմանագրից ու Բեռլինի կոնգրեսից հետո: Մոտակա նպատակն էր հայ ժողովրդի ինքնապաշտպանության կազմակերպումը, վերջնական նպատակը՝ սեփական ուժերով Հայաստանի անկախության վերականգնումը: Կազմակերպության ղեկավարությունն իրականացնում էր Գերագույն խորհուրդը (Խաչատոր Կերեքցյան, Ալեքսան Էթելեկյան, Հովհաննես Աստուրյան և ուրիշներ): Անդամներն էին մտավորականներ, արհեստավորներ, երկրագործներ, կազմված էրտասնյակների համակարգով: Կազմակերպությանը հովանավորում էր Կարինի հոգևոր առաջնորդ Մաղաքիա Օրմանյանը: «Պաշտպան հայրենյաց»-ն իր մասնաճյուղերն ուներ Արևմտյան Հայաստանի մեծ մասում: Կազմակերպությունը թռուցիկներ էր տարածում՝միասնական ուժերով թուրքական լուծը թոթափելու կոչերով:«Պաշտպան Հայրենյաց»-ի «արմատական» թևը, ազատագրության միակ ուղին համարելով զինված ապստամբությունը, կողմ էր անհապաղ զինված ելույթին, իսկ «չափավոր» թևի կարծիքով, զինված ելույթը պետք էր իրականացնել մանրակրկիտ և երկարատև նախապատրաստությունից հետո: ժողովրդի ինքնապաշտպանության համար զենք հայթայթելու նպատակով «Պաշտպան Հայրենյանց»-ը փորձել է նյութական միջոցներ գտնել, կապեր է հաստատել հայ քաղաքական և կրոնական գործիչների՝ Մ. Խրիմյանի (Խրիմյան Հայրիկ), Գ. Արծրունու, Կ. Պոլսի պատրիարք Ն. Վարժապետյանի, հայկականհամանման կազմակերպությունների հետ: 1882-ին ոստիկանությունը հայտնաբերել է կազմակերպությունը, ձերբակալել շատ անդամների: 1883-ին տեղի է ունեցել դատը՝ հայերի առաջին քաղաքական դատավարությունը Օսմանյան կայսրությունում: Հիմնադիր անդամները դատապարտվել են 5-15 տարվա բանտարկության: Նրանց մեծ մասը 1884-ին ներում էստացել:
«Պաշտպան հայրենյանց»-ի գործունեությունը նպաստել է հայ ազգային-ազատագրական շարժման նոր վերելքին:
Է.Կոստանդյան
Գրականության ցանկ
«Հայկական հարց» հանրագիտարան, Երևան, 1996 թ.:
Մուրադյան Մ., Ռուսաստանի պատմության հիմնահարցերը,Երևան, 2011:
Խրիմյան Հայրիկ, Խրիմյան Հայրիկ. Երկեր,Երևան, 1992:
ԵՊՀ 2-րդ մասնաշենք, 5-րդ հարկ,
Հեռ.` + 37460 71-00-91
Էլ-փոստ` info@armin.am
Բոլոր իրավունքները պաշտպանված են: Կայքի նյութերի մասնակի կամ ամբողջական օգտագործման, մեջբերումների կատարման դեպքում հղումը պարտադիր է` www.armeniansgenocide.am