• Նորություններ
• Հղումներ
• Գործընկերներ
• Կայքի քարտեզ

ԲՈՐՈՅԱՆ Սմբատ Գրիգորի, Մախլուտո (1881, Մուշ - 1956, Երևան, թաղված է Էջմիածնի Ս. Գայանե եկեղեցու բակում), ազգային-ազատագրական շարժման գործիչ, ֆիդայի: ՀՀԴ կուսակցության անդամ: Սովորել է Մուշի Ս. Մարինեի թաղամասի վարժարանում: Ազատագրական գործունեությունը սկսել է 1900-ից, «Երկաթ» խմբի կազմում: Գործակցել Է Անդրանիկի, Հրայրի հետ: Բորոյանը ահաբեկել է Աղբյուր Աերոբին մատնողներից մեկին: Մասնակցել է Առաքելոց վանքի կռվին (1901-ի նոյեմբեր ), եղել 1904-ի Սասունի ապստամբության ղեկավարներից (Գևորգ Չավուշի հետ գլխավորել է Իշխանաձորի մարտերը): Ապստամբությունից հետո անցել է Վան, ապա՝ Կովկաս, մասնակցել հայ-թաթարական ընդհարումներին, գլխավորել Ղամարլուի մարտերը: 1905-11-ի իրանական հեղափոխության ժամանակ կռվել է Ուրմիայի շրջանում: 1908-ի երիտթուրքական հեղաշրջումից հետո գործել է Մուշում: Առաջին համաշխարհային պատերազմի տարիներին՝ 1-ին կամավոր գնդի (հրամանատար՝ Անդրանիկ) փոխհրամանատար: 1918-ին կռվել է Զանգեզուրում: 1921-ի Փետրվարյան ապստամբության ժամանակ Թալինից և Աշտարակից Երևան շարժվող ուժերի հրամանատարն էր: Համագործակցել է (Դարալագյազում) Նժդեհին, ապա նահանջող ուժերի հետ անցել Պարսկաստան, հետո՝ Փարիզ: 1947-ին հայրենադարձվել է, ապրել և աշխատել է Երևանում: Բարայանի անունով Երևանում կա փողոց:

Ա. Ներսիսյան

Աղբյուր՝

«Հայկական հարց հանրագիտարան», Երևան, 1996 թ.: